ഭ്രാന്ത്

ഭ്രാന്ത്:
സ്വപ്നങ്ങൾക്കു സെസ് 
വന്നതാണ് കാര്യങ്ങൾ 
ഈ വഴിക്കായത്
പുത്തൻ നയങ്ങളുടെ
ശരവേഗ പ്രാബല്യം
സ്വപ്നങ്ങൾക്കു വിലക്കേർപ്പെടുത്തി
നിലവാരത്തിനനുസരിച്ച്
സ്വപ്നങ്ങൾക്ക്
നിറങ്ങളും ക്രമപ്പെടുത്തി
വർണ വ്യത്യാസത്തിന് 
അടവിലും ഭേദങ്ങളുണ്ടായിരുന്നു
സ്വപ്നമില്ലാത്തവരെങ്കിൽ
ഫൈനടച്ചാൽ മതീന്ന്

സ്വപ്നങ്ങൾക്കും സെസ്
ആളുകൾ ദുരിതത്തിലായിരുന്നു
ചിലർ ആത്മഹത്യ ചെയ്തു
വേറെ ചിലർ ഒളിച്ചോടി
ഇനിയും ചിലരെ കാണാതായി
മറ്റു ചിലർ പട്ടിണി കിടന്നു
ഇതിലും ഭീകരമായിരുന്നു അത്:
അവർക്കെല്ലാം ഭ്രാന്തായി

സർക്കാരിൽ നിന്ന് പുതിയ 
ധനസഹായം വന്നു
ഭ്രാന്തുള്ളോർക്ക് സൗജന്യ ചികിത്സ
ഭ്രാന്തിനു സെസ് എന്ന
ഘട്ടത്തിൽ സെസ് പിൻവലിക്കപ്പെട്ടു
നഷ്ടങ്ങൾ നികത്തിയ ശേഷം സെസ് -
സ്വപ്നത്തിന്റെയും ഭ്രാന്തിന്റെയും.

അവസാനം

അവസാനം:
ഇനിയും എല്ലാം ബാക്കിയാണ്...
പത്തുമണി വിടർന്നു തീർന്നിട്ടില്ല.
കാക്ക കൂടുകൂട്ടുന്നതേയുള്ളൂ ,
കുയിലുമുട്ടയിടാനും.
കോഴി അടയിരിക്കേണ്ട ദിനങ്ങൾ അവസാനിച്ചിട്ടില്ല.
കാലവർഷം വന്നു പോയിട്ടില്ല.

ശയനമുറികളിൽ ബലിയാരംഭിച്ചിട്ടേയുള്ളൂ.
അപ്പനപ്പൂപ്പന്മാരെല്ലാം തെരുവുകളിലേക്ക്
ആട്ടിത്തെളിക്കപ്പെട്ടുകൊണ്ടിരിക്കുന്നു.
സന്താനങ്ങൾ
'ആരോ ഒണ്ടാക്കി വിട്ടതാണ് '
എന്നു പറയിപ്പിക്കാറാകുന്നു.

പുഴയിലിനിയും വെള്ളമുണ്ട്.
ഉഷ്ണക്കാറ്റ് ഇനിയുമെത്തിയിട്ടില്ല.
മലകൾ മാന്തി ചെന്നപ്പൊഴേക്കും
മരങ്ങൾ ഇനിയും ബാക്കിയെന്ന്.
കോൺക്രീറ്റിടങ്ങൾ നിറഞ്ഞിട്ടുണ്ട്,
കവിയാൻ ഇനിയും നേരമാകും.
ഇനിയും മാലിന്യങ്ങൾ വീഴാൻ
ഭൂമിയിൽ ഇടം ബാക്കിയുണ്ട്.

ഭ്രാന്തൻ നയങ്ങൾ
വരാറാവുന്നേയുള്ളൂ.
കുതികാലുവെട്ടാനാലോചനയും
കൊലപാതകങ്ങൾക്ക് ബ്ലൂ പ്രിന്റും
തയ്യാറാവുന്നേയുള്ളൂ.
യുദ്ധങ്ങൾക്കു പേരെഴുതിക്കൽ
നടക്കാനിരിക്കുന്നു.

നഗരങ്ങളിൽ പെൺകുട്ടികൾ
പീഡിപ്പിക്കപ്പെടുന്നത് 
നാമിനിയും കണ്ടില്ല.
നീ തീവ്രവാദി ആകാനിരിക്കുന്നേയുള്ളൂ.
ഞാനോ ഇനിയും ജനിച്ചിട്ടില്ല.
ഇതിനുമെത്രയോ ശേഷമാണത്
വരാനിരിക്കുന്നത്.