ഭ്രാന്ത്

ഭ്രാന്ത്:
സ്വപ്നങ്ങൾക്കു സെസ് 
വന്നതാണ് കാര്യങ്ങൾ 
ഈ വഴിക്കായത്
പുത്തൻ നയങ്ങളുടെ
ശരവേഗ പ്രാബല്യം
സ്വപ്നങ്ങൾക്കു വിലക്കേർപ്പെടുത്തി
നിലവാരത്തിനനുസരിച്ച്
സ്വപ്നങ്ങൾക്ക്
നിറങ്ങളും ക്രമപ്പെടുത്തി
വർണ വ്യത്യാസത്തിന് 
അടവിലും ഭേദങ്ങളുണ്ടായിരുന്നു
സ്വപ്നമില്ലാത്തവരെങ്കിൽ
ഫൈനടച്ചാൽ മതീന്ന്

സ്വപ്നങ്ങൾക്കും സെസ്
ആളുകൾ ദുരിതത്തിലായിരുന്നു
ചിലർ ആത്മഹത്യ ചെയ്തു
വേറെ ചിലർ ഒളിച്ചോടി
ഇനിയും ചിലരെ കാണാതായി
മറ്റു ചിലർ പട്ടിണി കിടന്നു
ഇതിലും ഭീകരമായിരുന്നു അത്:
അവർക്കെല്ലാം ഭ്രാന്തായി

സർക്കാരിൽ നിന്ന് പുതിയ 
ധനസഹായം വന്നു
ഭ്രാന്തുള്ളോർക്ക് സൗജന്യ ചികിത്സ
ഭ്രാന്തിനു സെസ് എന്ന
ഘട്ടത്തിൽ സെസ് പിൻവലിക്കപ്പെട്ടു
നഷ്ടങ്ങൾ നികത്തിയ ശേഷം സെസ് -
സ്വപ്നത്തിന്റെയും ഭ്രാന്തിന്റെയും.